Jojak Kosan Sejarah Jalan KetoApi Kualo Pilah - Jalan Sawah Lebar

“Sawah Lebar… Kobau Banyak… Air Pigi Sojuk Sekaliiiii”… Itulah antaro potikan lagu Apo Nak Dikato dendangan Ito Blues Gang yang menceritokan keunikan daerah-daerah dalam Negori Sembilan (Kualo Pilah, Toluk Komang PD, dan Tampin).

Den raso tak ramai generasi sekarang yang tau pasal sejarah jalan sawah lebar ni. Mungkin secaro zahir, jalan Sawah Lebar ni tak ado apo-apo keistimewaan pun, samo yo dongan jalan-jalan lain tapi sebonar’eh ado menyimpan sejarah yang tersendiri. Manokalo bagi kebanyakan Oldtimer pulak tontu tau sejarah ini dan mungkin beranggapan ia tak berapo ponting. Mungkin golongan ini nak menceritokan mengenai hal ini tapi tak tau nak diluahkan pado siapo dan di mano medium pengantaro yang sesuai. Mako bertitik tolak dari itu, mako den raso terpanggil untuk cubo merungkai semulo sejarah lamo yang pado den adolah sesuatu yang unik dan wajar diketongahkan untuk tatapan generasi sekarang. Den tau pun melalui sumber tak rasmi arwah omak den. Jadi, ini adolah dari hasil interpretasi den sendiri dan tak semestinyo botul. Kalau ado fakta yang kurang topat atau langsung tak botul togur-togur la den yo.

Bagi penduduk tempatan, jalan Sawah Lebar ni memang agak sinonim terutamo bagi yang tinggal di sekitar area jalan nak menuju ke Bahau (khasnyo untuk wargo Boting yang memiliki lesen memandu “Agong”). Sonang cakap, ini adolah jalan alternatif untuk ke pokan Pilah dan sebaliknyo. Ini termasuk la den yang pornah suatu ketiko dulu lalu ulang alik ari-ari ke sekolah. Pado den, jalan ni laie selamat berbanding kalau ikut jalan bosar yang buleh diklasifikasikan sebagai menompah maut. Yo la, den naik basikal racing yo time tu, sekali lalu lori balak atau bas Starise… dio punyo impak hombusan angin pun dah cukup untuk menggugat kestabilan kayuhan, silap-silap buleh bersepah dibuek’eh.

Lagipun jalan Sawah Lebar ni rodup dek naungan pohon-pohon kiri-kanan jalan. Kalau tibo musim rambutan, selalu jugak den rembat rambutan yang masak ranum dokek topi jalan tu. Kekadang tu den raso bersalah lak sobab ambik hak orang tanpo kebenaran.
Keluasan jalan ni lobih kurang lebar sebuah keto dalam satu-satu maso. Kalau nak selisih duo keto, salah sorang kono mengalah ke topi (ala, macam jalan dari godung Nasir bawak ke Boting Ulu tu).

Diriwayatkan pado zaman Jopun atau British (den tak pasti) dulu jalan Sawah Lebar ni iolah laluan landasan keretapi yang menghubungkan dari pokan Pilah ke Juasseh pokan. Macam tak percayo lak kan, Pilah ado stesen keretapi tu, (Tapi raso-raso’eh den tak pornah jumpo lak fakta ni dalam buku sejarah atau den yang terlopeh pandang. Sobab’eh sonang yo, subjek sejarah paling den tak gomar maso sekolah dulu).

Fungsi’eh tak lain tak bukan mestilah untuk keperluan logistik iaitu mengangkut hasil bumi untuk dieksport… (Mungkin gotah la agak’eh). Lokasi stesen keretapi Pilah terlotak di Bazar, tapi maaflah yo den tak tau bolah mano tapak asal eh… Dalam filem Tunang Pak Dukun pun tak ditunjukkan pulak warisan sejarah ni.

Tapi kalau diikut akal logik, ado botul jugak kan. Meh kito sesamo cubo “Virtual Reality Tour” ni hehehehe… Baco Bismillah dulu, kosongkan fikiran, pojam mato, relaks…

Cubo bayangkan sekarang kito berado diantaro area Bazar & belakang deretan rumah kodai jalan bosar, tu dan mengadap ke arah masjid. Kemudian kito zoom out laie slow-slow jauh ke dopan sampai la penghujung’eh dokek kubur cino tu. Secaro fizikal, kan bontuk jalan tu kebanyakannyo lurus, kan? Yo la, takkan landasan keretapi nak konar-konar .

Sekarang kito berado di simpang ompek yang ado konar tajam ke kanan tu (Kanan ke Sungkak (harap botulkan kalau salah), kiri ado Tadika Kemas ke Kg. Toluk yang ado jambatan yang buleh keluar ke belakang bengkel seborang pasaraya Aktif; kito toruskan perjalanan ke arah pukul 12. ) Wah !, dah ado Pejabat Umno Cawangan Simpang Empat Sawah Lebar. Mulo-mulo den ingatkan banglo orang kayo mano tadi hehehehe…

Eh, kito dah sampai kek jambatan belakang kilang Mardec la. Suatu ketiko dulu, Sungai Muar ni cukup luas macam laut pado perspektif den yang maso tu baru berumur belasan tahun. Biaso la kan, maso tu dunio hanyo terbatas dalam Pilah yo…
Ok, kito sambung laie kembaro kito. Sekarang kito sodang melalui jambatan kayu tu. Saiz jambatan ni pun ngam-ngam untuk sebuah motor / basikal dalam satu-satu maso. Kono lalu sorang-sorang, tak buleh nak selisih kang kok ado yang terjunam ke dalam Sungai Muar. Perghh… cuak beb. Walaupun binaannyo kukuh dan stabil (tak la tahap ekstrem macam jambatan gantung yang terhuyung-hayang tu kan hehehehehe) diiringi lak dongan aroma hasil pengeluaran kilang Mardec tu, sambil meniti tu mato mesti tak lokang dari memandang kiri…kanan…kiri…kanan. Tengok dopan, ala jauh laie rupo’eh. Walhal tak do la panjang mano pun jambatan tu kan, ado la dalam 500 meter lobih kurang tapi tak mustahil buleh mengeluarkan poluh jantan (sekarang dah upgrade jambatan konkrit dan buleh muek keto lalu).

Sekarang kito dah selamat sampai ke pintu belakang Mardec yang berado botul-botul kek hujung jambatan kayu. Pandang ke kanan ado 2-3 kolam takungan siso industri Mardec. Lamo dulu Sungai Muar pornah mengalami tahap pencemaran yang kronik disobabkan pihak Mardec tolah sesuko ati membuang sisa industri secaro torus ke dalam sungai sehinggo menjejaskan ekosistem semulojadi hidupan air di situ (Sungguh tak do sivik mereka ini). Tapi seingat den, kolam takungan ni memang dah ado waktu den kocik-kocik dulu.

Kemudian ado rumah kayu bolah kanan yang seingat den dihuni oleh keluargo India. Kalau tak silap, den pornah dikojar dek anjing peliharaan keluargo ni hehehehe… Rimau botul la. Kemudian kito nampak beberapo rumah kampung kiri & kanan jalan sampai la ke penghujung “landasan” dan nun di seborang jalan sanun terpampang stesen minyak Petronas. Den suko ado Petronas dibino dokek situ (walaupun den pengguno tegar “minyak biru”), sonang sikit penduduk sekitar nak isi petrol tak payah poie pokan dan sekurang-kurang’eh dapek menceriakan sikit suasano area situ yang agak suram & seram bilo lalu pado waktu malam.

Ok, kembaro kito berakhir di sini. Maaf la yo sobab tak se”best” tour merentas maso Petrosains tapi pado yang pornah mengalami pengalaman ini, pasti warih sekalian akan paham dan tersonyum sendiri. Justeru, den tak fikir panjang untuk balik kampung (setolah hampir limo bulan tak balik) pado ahad 19 April 2009 bersamaan 23 Rabiulakhir 1430 Hijrah untuk ambik gambar-gambar esklusif untuk tatapan warih-warih pilahbest.blogspot.com. Maaf kalau kualiti gambar agak kurang, den pakai kamera digital murah, bolum berkemampuan nak boli DSLR.

Permulaan tadi den ado sobut landasan keretapi ni menghubungkan antaro pokan Pilah ke Juasseh pokan, kan?... Tapi kosan sejarah hanyo sampai ke kubur cino sajo, kemudian dah terbontang jalanrayo Pilah – Bahau. Kosan tinggalan seterusnyo kita fokus kek pokan pelangai. Perasan tak, ado sebatang jalan lurus saujana mato memandang yang bermulo dari Sekolah Rondah Pelangai, dopan sikit jumpo rumah Dukun Mahadi, kemudian torus sampai ke Juasseh pokan. Bab ni den tak tau sangat…

Persoalan’eh, mano landasan yang “hilang” antaro kubur cino – Pelangai itu? Den raso mungkin jalanrayo yang sedio ado sekarang ni yang jadi landasan dulu-dulu. Tapi den terfikir jugak, dah tontu jalanrayo ni memang dah sedio ado sojak dulu kan?... Ataupun kedudukan landasan ni bersebolahan dongan jalanrayo, ataupun bayangkan ado satu garis lurus yang menghubungkan antaro duo tompek ni, mungkin melalui hutan belakang Petronas tu (macam tak praktikal lak raso’eh sobab ado bukit kan…). Tapi ini cumo teori den yo, jangan marah lak.
Jarak keseluruhan landasan, tahun dibino, tahun beroperasi, berapo lamo beroperasi, tahun ditutup dan punco den tak pasti lak. Kepado warih yang tau tu silo la update & lakukan la penambahbaikan rencano ni, bak kato pepatah Sharing Is Caring.

Sekian..

P/S : Kepado tuan tanah, kalau diizinkan den akan menaip laie. Sebonar’eh den ado banyak cerito yang nak dikongsi bersamo cumo yo la kan…den ni tak berapo rajin (tapi bukan maleh) hehehehehe… Banyak bonar halangan’eh. Kekadang tu dah semangat nak menaip, idea lak tak mari… Waktu idea mari, jari lak maleh nak menaip. Tu la pasal… Yo la yo la, yang sebonar’eh memang den maleh hehehehehehehe… Nak menyiapkan artikel ni pun makan maso berhari-hari padohal tak do la panjang mano pun

##- EHSAN YANG BERNAS DAN MANTAP DAGHI EDI - timo kasih banyak2 bro... kalau ado .. bagi lagi.. jangan simpan sampai bersawang... wokehhh